Mannrán og pyndingar vegna fjármálaráðgjafar

Ekki eru allir jafn skilningsríkir og Íslendingar þegar kemur að tilviljunum, óheppni og vanhæfni.  Gengi elllilífeyrisþega sem rændi og pyndaði fjármálaráðgjafa sinn til að refsa honum fyrir blekkingar var dæmt í fangelsi í Þýskalandi dag.

Óaldaflokkurinn aldraði sat fyrir fjármálaráðgjafanum James Amburn, 56 ára, fyrir utan heimili hans í Speyer í vesturhluta Þýskalands, þeir bundu hann með málningarlímbandi og tróðu í skott bifreiðar eftir að einn meðlimur hópsins hafði danglað í höfuð þjónustufulltrúans með göngugrind.

Saksóknari segir félagana Koening og Dehmer hafa ráðist á Amburn fyrir utan hús hans og troðið honum í stóran pappakassa sem þeir svo trilluðu (á göngugrindinni?) yfir í skott á þýskri Audi saloon bifreið, silfurlitri, með beinni innspýtingu og sjálfskiptri, sem er þægilegt fyrir eldri borgara sem eru seinir á beinskiptingunni.

Flokkurinn vildi reyna að endurheimta tap upp á 2,3 milljónir punda sem fjárfestar voru með hjálp Amburns í bréfum sem lækkuðu í verði í alþjóðlegu niðursveiflunni.

Ekið var með Amburn 300 mílur í hús við hið fallega Chiemsee vatn í Bavaríu, en það gekk þó ekki betur en svo að ráðgjafinn slapp frá þeim á bensínstöð.  Öldruðum ræningjum hans tókst þó að endurheimta hann og börðu hann svo við það tækifæri að tvö rifbein brotnuðu.

Amburn var haldið í kjallara hússins í fjóra daga í júní síðastliðinn og var barinn og pyndaður af ellilífeyrisþegunum, knúnum áfram af bræði sem nærðist á brostnum draumum um gullin starfslokaár með nóg af gulli í bankanum.

“Hann sagðist vera viðskiptaráðgjafi og lofaði 18% arði á sparnað okkar,” sagði Koening.  “Í byrjun stóðst það, en svo skeit hann yfir okkur.”

Koening hjónin hittur fyrir tilviljun Dehmer, sem sagði þeim að Amburn skuldaði honum 690.000 dollara.  Í sameiningu ákváðu þau svo að veita honum ráðningu.

“Óttinn við dauðann var ólýsanlegur,” sagði Amburn og bætti við að hann hefði verið barinn og pyndaður í þá fjóra daga sem honum var haldið nöktum í kjallaranum.

Honum var bjargað eftir að eldriborgararnir skipuðu honum að senda fax til að losa um fjármagn af svissneskum reikningi og tókst að krota beiðni um lögregluaðstoð á faxið meðan hann fékkst við þá viðskiptafærslu.

Þeir gömlu voru svo ánægðir með árangur pyndinganna í formi fjármagns frá Sviss að þeir hleyptu Amburn út í garð í smókpásu, en þar reyndi hann að leggja á flótta á ný með því að hlaupa yfir grindverk. 

Í grenjandi rigningu hljóp hann niður götuna með fangara sína á eftir sér, akandi á Audi A8 bifreiðinni sem þeir höfðu notað til fangaflutningsins áður.  Margir sáu ráðgjafann, en Koening kallaði til þeirra ”Hann er þjófur!”

Amburn var því draslað aftur í kjallarann.  Skömmu síðar hringdi svissneski bankinn í lögreglu í Þýskalandi eftir að hafa séð skilaboð á faxinu um að hringja í lögreglu.

Vopnað lið sérsveitamanna réðist á húsið og frelsaði nakinn og hrakinn fjármálaráðgjafa sem enn þiggur áfallahjálp vegna eldraunarinnar.

Verjandi flokksins hélt því fram að fólkið væri ekki “stórglæpafólk”.

En sækjandinn var á öðru máli og sagði það hafa sýnt “mikinn glæpaþrótt”.

Old Rage Pensioners jailed for kidnapping and torturing financial adviser over investment losses

Forsíðumynd af Chiemsee vatni: CC Allie Caulfield